August 13, 2020

“نازانم تەمەنم چەندە، منداڵەکانم دەڵێن سەدوچواردە ساڵم. لەوکاتەی لەدایکبووم تاکو ئێستا ناسنامەم نیە، بۆیە نازانم چەند ساڵ تەمەنمە. زۆر شت هەن کە لەیادمچونەتەوە، شتەکان وەک خەون و خەیاڵ دێنە بەرچاوم. ئەوەندەم بیرە کە ئەم کۆڵان و شەقامانە بوونیان نەبوو، بەڵام ئێستا هەمووی بووە بە ماڵ و جێگەی کار، هیچ شتێک وەک خۆی نەماوە، هەموویان گۆڕاون. هەروەک چۆن شێوە و لەشی ئێمەش گۆڕاوە. جاران بە گورجی دەهاتم و دەچووم، بەڵام ئێستا نە دەتوانم هەستم، نە دەتوانم دانیشم، تەنانەت ناتوانم دەستەکانم بەرزبکەمەوە. هەتاکو ئێواران لێرە دەمێنمەوە، دەبینم چۆن ژیان و تەمەنم وەک فیلمێک بە بەرچاومدا تێدەپەڕێت. ژیان هێندەی جوانییەکەی سەختە. پێویستە مرۆڤ بە جۆرێک بژی کە نرخ و بەهای ژیانی خۆی بزانێت”.