February 20, 2021
“ته‌مه‌نم شه‌ست ساڵە و نه‌چووم بۆ قوتابخانه، به‌ڵام توانای نووسین و ژماردنی ئه‌و كه‌سانه‌م هه‌یه كه چا به قه‌رد ده‌‌خۆنه‌وه له چایه‌خانه‌كه‌م. ماوه‌ی په‌نجا و سێ ساڵه به‌بێ دابڕان له دوكانه‌كه‌م چا و نانی بەیانی پێشكه‌ش به میوانان دەکەم. رۆژانه كاتژمێر پێنجی به‌یانی دێمه دوكان تا بانگی مه‌غریب خه‌ڵك، گه‌شتیار و كه‌سی بیانی سه‌ردانم ده‌كه‌ن بۆ چا خواردنه‌وه. خاوێنی كاره‌كه‌م و رووخۆشیم له‌گه‌ڵ خه‌ڵك وای له من كردووه پیشه‌كه‌م خۆشبوێت و به‌ردەوام بم. هه‌ر گه‌شتیارێك روو له ئاكرێ بكات تا سه‌ردانی چایه‌خانه‌كه‌م نه‌كات و چایەك به ده‌ستم نه‌خواته‌وه ئاسووده نابێت. دایلێكتی زمانی كوردی سه‌رجه‌م ناوچه‌كان فێر بووم به‌بۆنه‌ی كاره‌كه‌مەوە، به ده‌یان رێزلێنام وه‌رگرتووه له لایه‌ن فه‌رمانگه‌ی گه‌شتوگوزار و رێكخراوه كه‌لتووری و هونه‌رییه‌كانەوە. ته‌نانه‌ت هونه‌رمه‌ندانیش كاتێك سه‌ردانی ئاكرێیان ده‌كرد بۆ ئاهه‌نگگێڕان چایخانەکەم ببووە ناوه‌ندێكی هونه‌ر و گۆرینه‌وه‌ی بیروڕای هـونه‌ری. به‌شێكی زۆری هونه‌رمه‌ندانی كوردستان و ته‌نانه‌ت عه‌ره‌بیش سه‌ردانیان كردووە، هـــــونه‌رمه‌ندان (ساڵه‌ح ئامێدی و ته‌حسین ته‌ها و ئایاز و ئه‌ده‌وان زاخۆلی) هاتوونه‌ته لام”.