2/04/2025
ناوم (سەوزە مەعروف سەعید)ە. ساڵی ١٩٥٦ لەدایک بووم. لە تەمەنی چوار ساڵییەوە، بەھۆی نەخۆشییەکەوە ھەردوو چاوم لە دەستداوه. شەوێك به‌چاوی ساغه‌وه خەوتم و بۆ بەیانییه‌كه‌ی، به کوێری خه‌به‌رم بوویه‌وه! نه‌خۆشییه‌كه بۆماوه‌یی نییه و له بنه‌ماڵه و خێزانه‌كه‌ماندا، تا ئێستا كه‌سێكی نابینای تێدا نه‌بووه، ئه‌وه منم بوومه‌ته تاقانه‌ی ناویان.
لە ڕێگەی براژنەکەمەوە فێری دروومانی بووم، یەکەمین جار كه کراسێکم دروو، تەمەنم ١٣ ساڵان بوو… له‌و كاته‌وه تا ئێستا له‌سه‌ر ئه‌و كاره بەردەوامم. زۆرتر، ماکسی، کراس و جلوبه‌رگی کوردی بۆ خەڵکی دەدرووم، بەڵام ماوه‌یه‌كه شێرپه‌نجه به‌رۆكی گرتووم و سه‌ردانی نەخۆشخانەی ھیوا ده‌كه‌م. چی تر ناتوانم وه‌ك جاران ئه‌م كاره بكه‌م و تەنھا پۆشاک بۆ خۆم دەدرووم.
جاران، (کەوا) زۆر ئەستەم ده‌دوورا و بەم جۆرەی ئێستای نەبوو، حەوت بۆ ھەشت پارچه‌ی هه‌بوو. بێجگە لە کاری دروومانی، ده‌ستچنی و جانتا و شوێنکلێنسم بە مووروو دروست ده‌كرد. دەستم بدایه‌ته ھەر شتێک، زوو فێری دەبووم، به‌هره‌كه‌م خواكرد بوو، تەنانەت مەکینەی دروومانیشم بۆ خه‌ڵكی چاک دەکرده‌وه.
سەرباری ئەوەی بیناییم لە دەستداوە و نه‌خۆشیشم، به‌ڵام له ئێستادا، لەم سەنتەرە، وانەی دروومان دەڵێمەوە و ھیچ شتێک نەبووەتە ڕێگر لەبەردەم کار و ژیانمدا. وانه بە خاوەنپێداویستییە تایبەتەکانیش دەڵێمەوە، بەتایبەت ئەو کەسانەی نابینا و نابیستن. به‌رده‌وامم و بۆ ھەموو فێستیڤاڵەکان دەچم و کارە دەستییەکانی خۆممی تێدا نمایش دەکەم… كاركردن لای من ژیانه.