Humans of Kurdistan
پڕۆژەی Humans Of Kurdistan ئامانجیەتی فرەکەلتووریی وڵاتی کوردستان بخاتە ڕوو، لە ڕێگەی فۆتۆی ڕووخساری خەڵکەکەی و چیرۆکەکانیان.

26/03/2025

لە كاری کۆڵبەریدا، ئازار و زەحمەتێكی زۆرم چەشت، بۆیە بڕیارم دا واز لەو ئیشه‌ قورس و گرانە بهێنم. بە یارمه‌تی دۆستان و به‌ پاڵپشتی خێزانەکەم، دەستم كرد بە کاری هونەری پەیکەرسازی. ناوم عومەر پزشکییانە، خەڵکی گوندی (کۆڵان)ی سەر بە شاری مەریوانم. تەمەنم ٤٣ ساڵە و خاوەنی دوو منداڵم. ئه‌و دارە وشکانەی خەڵکی وەک خاشاک فڕێی دەدەن، من کۆیان دەکەمەوە و پەیکەریان لێ دروست ده‌كه‌م. ئێستا کارەکەمم زۆر خۆش دەوێت و به‌ چێژه‌وه‌ ورده‌كاری تێدا ده‌كه‌م. ئەمەش وایکردووە له‌ ناوخۆی وڵات و بگره‌ له‌ ده‌ره‌وه‌ش، داواکاری لەسەر په‌یكه‌ره‌كان هەبێت. چەندین پێشانگەی تایبه‌تیم کردووه‌ته‌وە و بە باشی پێشوازییان لێ کراوە. بژێوی ژیانم بە فرۆشتنی بەرهەمە هونەرییەکانم دابین ده‌كه‌م و خولیای ئەوەم بەم نزیکانە، لە وڵاتی ئیتاڵیا، پێشانگەیەکی تایبه‌تی بکەمەوە. ...

26/2/2025

بە پیشەی دارتاشیی دەستم پێکرد. وەک دایکێک، کە منداڵەکەی بە ئەوین و خۆشەویستییەوە پەروەردە دەکات، هەر بەو ناسکی و سۆزەوە، عاشقانە لەگەڵ چێو (دار) کارم دەکرد. بەم هۆکارەش، کارەکانم بە دڵی خەڵک بوون.عەشقم بۆ جوانکاری و قووڵبوونەوە لەو هونەرە، ڕێگەی پێ نەدام بکەومە شوێن هەندێ کاری لاوەکی و دەستکەوتنی پارەم لە لا گرنگ نەبوو. بۆیە کاتێک دەمبینی، کارە دەستییەکانم و بەرهەمی هونەرەکەم بۆ دەرەوەی وڵات دەنارد بۆ من مایەی شانازی بوو.هیچ کات لاساییی کاری کەسی ترم نەکردووەتەوە، هەمیشە بە شوێن کاری تایبەت و جیاوازەوە بووم و لەبری لاسایی کردنەوە، پێم باشتر بووە خۆم داهێنان بکەم و شتی نوێ و جوان بەرهەم بهێنم. هەر بۆیە گەر کەسێک داوای دروستکردنی کارێکم لێ بکات، ئارەزوو دەکەم داهێنانی تێدا بکەم.بەو بۆنەیەوە، لە ئێستادا سەرقاڵی دروستکردنی ئامێری دەهۆڵم بۆ کچەکەم. پێشتریش بۆ کوڕەکەم ئالەتی زوڕنا و باڵەبانم دروستکردووە. بە ئەنجامدانی ئەم کارانە، ئیتر دڵنیا دەبمەوە لەوەی لەم ژیانە کورتەدا؛ پێویستە بۆ دڵ بژین، نەک بۆ پارە. ...

29/01/2025

من، پەریسا ڕەحیمی، تەمەنم ۲۸ ساڵە. گەرچی بڕوانامەی ماستەرم لە ئەندازیاریی کۆمپیوتەردا هەیە، بەڵام لە منداڵییەوە سوارچاکی خولیا و ئاواتم بووە.ماوەی ۱٥ ساڵە بە ئەسپسوارییەوە سەرقاڵم و وەک ڕاهێنەر لە یەکێک لە یانەکانی شاری سنە خزمەت دەکەم.ئەسپسواری، جگە لەوەی وەرزشێکی دێرین و تایبەتە، لە چەند ڕوویەکیشەوە تایبەتمەندی خۆی هەیە و ئارامیی دەروونی و ئاسوودەییت پێ دەبەخشێت.بەشداری چەندین پێشبڕکێی ئەسپسواریم کردووە، لەسەر ئاستی ئێران و ڕۆژهەڵاتی کوردستان، توانیومە پلەی یەکەم، دووەم و سێیەم بەدەستبهێنم. ماوەی چوار ساڵ جێگری سەرۆکی دەستەی ئەسپسواری شاری سنە بووم. خاوەنی بڕوانامەی فەرمی فیدراسیۆنی ڕاهێنەرایەتی (پلە سێ)م، لە ئەسپسواریدا، بڕوانامەی تایبەتیم بۆ ڕاهێنانی خاوەن پێداویستییە تایبەتەکان هەیە. هەموو کاتێکم بۆ ئەم پیشەیە تەرخان کردووە، شانازی بەوەوە دەکەم کە دەتوانم ئەم وەرزشە جوانە بە خەڵکانی تر ببەخشم. ...

22/1/2025

مام تۆفیق، خاوەن پێداویستیی تایبەتە. تەمەنی ٨٤ ساڵە. نزیکەی ٥۰ ساڵە لە شارۆچکەی (حەسەنئاوا)ی سنە، سەرقاڵی چاککردنەوەی چرای نەوت و سەماوەر و پڵیتەدانی زۆپایە. وەک وەستایەکی کارامە و دەستڕەنگین دەرکەوتووە و تا ئێستا لەسەر پیشەکەی بەردەوامە. لە پاڵ کاری چراسازی، وەک پزیشکێکی میللیش کار بۆ ئەو کەسانە دەکات کە ناوکیان کەوتووە و ناوکیان بۆ دەگرێتەوە. گەرچی مام تۆفیق نابیستە، بەڵام بە زمانی ئاماژە لە دواکاری کڕیار و چارەخوازەکان تێدەگات و پەیوەندییەکی زۆرباشی لەگەڵ دەوروبەرەکەیدا دروست کردووە. ...

27/11/2024

خەڵکی بە مام دەروێش بانگم دەکەن، بەڵام ناوم عەففان حەمەیوسفە. لە شارۆچکەی بیارە لە دایک بووم و هەر لەوێش ٦٨ ساڵی تەمەنم بەڕێ کردووە.سنووری دەستکرد، وڵاتەکەی من و گوندەکەمی کردووە بە دوو بەشەوە. چایخانەکەم لە نێوان ئەو دوو سنوورەدا دروستکردووە. لە سنووری چایخانەکەمدا سنوور نییە، بە بێ جیاوازی چا و شیری گەرم پێشکەش بە میوانەکانم دەکەم. ئەم چایخانە بچووکە، بووەتە شوێنێکی گەشتیاری و لە هەموو جێگەیەکەوە خەڵکی سەردانم دەکەن. ئەم شوێنەی کە چای تێدا لێ دەنێم، کەوتووەتە سنووری عێراق و ئەو شوێنەشی کە میوانەکانم لێی دادەنیشن، سنوری ئێرانە، بەڵام بەلای منەوە هەر کوردستانە. ...

6/11/2024

وەک هەر ژنێکی تری ئەم کۆمەڵگەیە لە ژیانمدا هیچکات حەزم نەکردووە لە ماڵەوە کاربکەم و کارم تەنها یارمەتیدانی خێزان و خواردن دروستکردن بێت. من ویستوومە دەستی خۆم لە گیرفانی خۆمدا بێت، ڕام وایە ژنێک دەتوانێت ماڵێکی گەرم و ڕازاوەی هەبێت و خاوەنی کاری خۆی بێت. بەڵام ئەمە بۆ من قورسە کە لە شارێکی بچووکی وەک مەریواندا بژی. ناوم نگین فەتاحیە، پێشتر دووکانێکی بچووکی جوانکاریم هەبوو، بەڵام وازم لەو کارە هێنا و ئێستا شوێنێکم بۆ شۆردنی ئۆتۆمبێلەکان داناوە و بە هۆیەوە خەڵکانێکی زۆر ڕۆژانە سەردانم دەکەن، تەنانەت لە بەر زۆری کارەکە چەند کەسێکی تریشم دامەزراندووە . ...

30/10/2024

ئەم لاقە دەستکردەی لە نەخۆشخانە بۆیان دروستکردم ئازاری دەدام، بۆیە چەند جارێک گۆڕیم، تا ئەو کاتەی لاقێکی دەستکردم لە درەختی بی بۆ خۆم دروستکرد، ئیتر نازناوی حوسێن دارتاشم وەرگرت. عاشقی سرووشت و کێوەکانی کوردستانم. ڕۆژێکیان لە سەر سنوری نێوان باشوور و ڕۆژهەڵاتی کوردستان بە شوێن گیا بەهارییدا دەگەڕام، لە ناکاو مینێکی بەجێماوی جەنگی ئێران و عێراق بە لاقمدا تەقییەوە و بە هۆیەوە لاقێکم لەدەستدا. بەڵام ئەو کاتەی فێری کاری دارتاشی بووم و کۆچم بۆ شاری مەریوان کرد هیوایەک لەدڵمدا دروستبوو کە لاقێکی دارین بۆ خۆم دروست بکەم. لە ماوەی بیست ساڵی کارکردنمدا، چەندین لاقی دەستکردم بۆ مرۆڤەکانی تر دروستکردووە کە بۆ هەستانەوە لە سەختییەکانی ژیان پێویستیان بووە. هەمیشە دەردەکانی دڵم بە ژەنینی شمشاڵەکەم دەردەکرد کە ئەمیشم لە چڵی درەختێکی چیاکانی کوردستان دروستکردووە. ...

15/10/2024

ئەم نەورۆزە، تەمەنم دەبێت بە شەست ساڵ و ئیتر بۆ هەمیشە واز لەم پیشەیە دەهێنم. ڕەنگە من دوایین کوردی کوردستان بم کە هێشتا هونەری چەلەنگەری (دروستکردنی کەرەستەی وەک؛ کلیل، قفڵ، سەبەتە، چەقۆ و زنجیر) بکات. ئەم بیست ساڵە، سەرقاڵی ئەم هونەرە بووم، وەک ژیان لێم ڕوانیوە و ڕۆژە گرنگەکانی ژیانی هونەریم بووە .هەموو شتێک لەو ڕۆژانەوە دەستی پێ کرد کاتێک ناو ژورەکەم پڕ کردبوو لە کارە هونەریەکانم، بەتایبەت ئەوانەی بە مقەبا و کارتۆن دروستم کردبوون، کارەکان بە جۆرێک بوون هەر کەسێک دەهاتە ماڵمان دەیوت: با بچینە ژوورەکەی بێهزاد. یەکەم کارم لە شاری سنە بوو، ئەم ساڵانەی دواتریش هەر لە سنە کارم کردووە و تەواوی ژیانم بۆ ئەم هونەرە داناوە. کارەکەم هێندە هونەرێکی گەورەیە تا کۆتای ژیان دەتوانم تێیدا بەردەوام بم، بەڵام بە داخم چونکە ڕەنگە لەبەر ژیان ڕۆژێک واز لە ژوورەکەم و هونەرەکەشم بهێنم. ...

May 22, 2023

" ٦٥ ساڵ تەمەنمە و خەڵکی ئاوایی دێوەزناوی سەربە ناوچەی سەوڵاوام. لە مناڵییەوە کارم ئەم توڵچنینەس، بەهۆی ئەوەی لای رۆخانەی سیروان ئەیژین و دار و چۆکلی ئەرخەوان لێرە زۆرە، بۆ زۆرینەی ئێمە ئەم کارە لە هەزار کارمەندی باشتر و بەسوودترە. تەواوی خەڵکی دێوەزناو خەریکی ئەم ئیشەن، ژن و مناڵمان دەیزانن و گوندەکەمان بەمە ناسراوە. تەواوی ئەو ئیشە دەستییانەی لە هەورامان دەیبینن هی گوندی ئێمەیە، بە خاوەر و سەیارەی گەورە هەمووجار دێن و هەموو کارەکانی گوند کۆدەکەنەوە. کە مناڵ بووین بابمان ئەمانەیان ئەبردە شارانی تر و لەگەڵ گەنم و شتانی دیکە دەیانگۆڕییەوە. جارێک بابم باسی ئەوەی ئەکرد کە بردوویەتییە هەمەدان و ئەو خەڵکە چەن بۆیان سەیر بوو کە ئێمە بە دار ئەمانەمان ساز کردووە، وتوویانە کە ئەم هونەرە وەکو فڕۆکە سازکردن سەیرە." ...

April 4, 2023

"١٠ ساڵ پێش ئێستا هاوسەرەکەم چوو ژنی هێنا و منی بەجێهێشت. خۆم و کوڕەکەم تووشی شێرپەنجە بووین، کوڕەکەم مرد بەڵام من مام. حەوت ساڵە بۆ ئەوەی دەست بۆ خەڵک رانەکێشم، خەریکی کاری سێوی مێخەکڕێژم و لە مەیان ئیقباڵی سنە دەسفرۆشی دەکەم. زۆربەی خەڵکی سنە دەمناسن و لە کارەکانم دەکڕن و دەیبەنە ئوروپا. زستان لەبەر سەرما زۆر عەزیەت دەخۆم و هاوینیش لەبەر گەرما، بەڵام خۆشحاڵم چون چەند ژنی دیکەش بەهۆی منەوە کار دەکەن و دەستکردەکانیان بۆ دەفرۆشم." ...

March 12, 2023

"عوسمان کێمنەیی یان عوسمان هەورامیم پێدەڵێن، ساڵی ١٩٣٦ لە ئاوایی کێمنە لەدایکبووم. تەواوی بنەماڵە و تیر و تایفەم دەنگخۆشبوون و گۆرانیان دەگووت. من لە بەشی هەورامانی لهۆنم بەڵام وەکو شوناسنامەی گۆرانی هەورامی و سیاچەمانەی هەورامان لێم ناو ئەبرێت. لەمنداڵییەوە حەزم بە گۆرانیوتن بووە بەڵام ساڵی ١٩٦٤ دوای بڵاوکردنەوەی یەکەم گۆرانیم لەڕادیۆی کرماشان ناسرام. ناتوانم بڵێم چەن گۆرانیم وتووە چونکە کەس نەبوو کۆی بکاتەوە و خۆشم هیچ سەوادم نییە و خوێندن و نووسین نازانم. لە ساڵانی ١٩٥٦ی میلادی کە زەبت هاتە مەنتەقەکەمان و نەواریان تومار دەکرد، ئەگەر رۆژێک حەوت سەعات گۆرانیم وتبێت خودا دەزانێت ئەکاتە چەن گۆرانی. بەڵام ساڵی ١٩٩٢ دەرمانخوارد کرام و بەداخەوە دوای ئەوە ئیتر نەمتوانی گۆرانی بڵێمەوە" ...

March 2, 2023

"وەختێ لە تارانەوە گەڕامەوە بۆ هەورامان بە دوای گۆڕانکاری بووم لە بواری کارە دەستییەکان. سەرەتا پێشوازیم لێنەکرا و دژبە من وەستان، بە یەکەم کارەکانم کە وەکو پێشانگایەک لە گوند دامنا پێیاندەگوتم من بەم کاری دارتاشینە خەریکی بت دروستکردنم و بتپەرەستی ڕەواج ئەدەم. ئەوکاتە بەنداو دروستدەکرا و خەریکبوون هەموو جێگەیەکیان هەڵدەتەکاند، دەستمکرد بە جەمکردنەوەی دارەکان بە بن و ریشەوە و کارم لەسەر دەکردن. وردە وردە کارەکانم لە نێو مەردم داکەوت و حەزیان لێکرد، ئێستە خەڵک خۆیان دارێک دەبینن دەینێرن بۆم و ئەڵێن کە بۆ کارەکانم بە کاری ببەم." ...