Redwan Adalat - Humans of Kurdistan

حوزەیران 05 2021

June 2, 2021

"بەپێی ئەوەی چەندین ساڵە لە کەرتی تەندروستی خزمەت ئەکەم، زۆر حاڵەتی سەیرم بینیوە بە خۆشی و ناخۆشییەکانییەوە. هەموو کات تا توانیبێتم یارمەتی نەخۆشم داوە ئەگەر لە توانای نەخۆشخانەکەشمان نەبووبێت. ئەرکی ئێمە خزمەتکردنی هاوڵاتییە بۆیە کە دەبینین نەخۆش و خاوەن نەخۆشێک لێمان ڕازین و دواتر بە چەپکەگوڵێک یان بەقسەیەکیش سوپاسمان دەکەن، گڕوتینی خزمەتکردنمان زیاتر دەبێت. ڕۆژێک لەکاتی چوونم بۆ دەوام لەناو نەخۆشخانە بینیم مناڵێکی (شلل دماغ) لەباوەشی خوشکەکەی بوو، بەپێی ئەوەی دەزانم ئەرکی ئەم نەخۆشانە زۆر قورسە بڕیارمدا مەسرەفی ئەم مناڵە چ لەڕووی ژیانکردنییەوە تا تەندروستی لەسەر من بێت. ڕۆژگار هات و ڕۆیشت ڕۆژێک کەسێکی بەڕێز هاتە ژوورەکەم و گوتی من باوکی مناڵە نەخۆشەکەم و هاتووم سوپاست بکەم لەپای ئەو هەموو چاکەیە و دەمەوێ پێت بڵێم خوا بۆخۆی بردیەوە. ناتوانم شوکرانە و سوپاسگوزاری و بەئەمەکی ئەو پیاوە هەرگیز لەبیربکەم. هەمووکات سوپاس و دوعاکانی بۆ من وایان لێکردووم قەت سڵ لە چاکەکردن نەکەمەوە". ...

زیاتر بخوێنەرەوە

حوزەیران 05 2021

May 31, 2021

by Redwan Adalat

0 Comments

لە: خەڵکی ڕۆژئاوا

"تەمەنم 10 ساڵان بوو کاتێک دایکم لەدەستدا. لە سەرەتای ئەو شۆڕشەی لە سوریا ڕوویدا کێشەی زۆر دەرکەوت و گێژاوی ئەمنی دروستبوو. من و خێزانەکەم خۆمان ئامادەکردبوو بڕۆین بۆ ماڵی باپیرم لە یەکێک لە گوندەکانی نزیک عامودا بەبۆنەی جەژنی قوربان. زۆر دڵخۆش بووین لەبەرئەوەی دەگەڕاینەوە بۆ گوندەکەمان بۆ بەسەربردنی کاتێکی خۆش و دوورکەوتنەوە لە شار و خوێندن بۆ ماوەی یەک هەفتە. نزیک کاتژمێر 10:30 شەو هەموومان سواری پاس بووین، کاتێک گەیشتینە دەروازەی گوندەکە، تەقەیەکی زۆر بەرەو ڕوومان کرا کە تاوەکو ئێستاش سەرچاوەکەی دیار نییە. زۆر ترسام و بە خۆمم وت سوپاس بۆ خوا کە خێزانەکەم هیچی بەسەر نەهاتووە، بەڵام سەیرم کرد کە دایکم شتێکی لێ هاتووە، کاتێک سەیری لاشەیم کرد بینیم کە خوێنی لێدێت. گەیشتینە ناو گوندەکە و بەپەلە دایکمیان گواستەوە بۆ نزیکترین نەخۆشخانە لە حەسەکە، بەڵام دوای چەند کاتژمێرێکی کەم هەواڵێکی زۆر جەرگبڕ بە من و خوشکەکانم گەیشت کە دایکمان مردووە". "هەموومان چەند ساڵێکی کەم بوو لەگەڵی ژیابووین، تاوەکو ئێستاش ئەو ڕۆژە شوومەم بیرناچێتەوە کە بەسەر من و خوشکەکانمدا هات. چیتر هەستم بە خۆشەویستی کەس نەدەکرد لە دەوورمان، هەستمدەکرد کە هەموو کەس ڕادەکات لە بەرپرسیارێتی بەرامبەرمان، هەستم بە لاوازی دەکرد. هەستمدەکرد هیچ کەسێک نییە پەنام بێت یان بەرگریم لێبکات بێجگە لە باوکم کە ئەویش خەمەکانی زیادیکرد دوای وەفاتی خۆشەویستەکەی. قسەم لەگەڵ کەس نەدەکرد بۆ ماوەیەکی زۆر، تەنها هەندێک هاوڕێ نەبێت کە بەردەوام ئەحواڵیان دەپرسیم. ئەو ماوەیەی کە تازە دایکم کۆچی دوایی کردبوو بڕوام بە خۆم نەمابوو، بەڵام ژیان بەردەوام بوو و نەوەستا سەرەڕای قورسی ئەو ژیانەی پێیدا تێدەپەڕین بەهۆی لەدەستدانی بەنرخترین کەسی ژیانمان، بەڵام باوکممان هەیە کە بۆ هەموو شتێک پشتی پێدەبەستین. تاوەکو ئەم ساتەش لەگەڵمان بوو و گەیشتوومەتە زانکۆ. ئێستا یاسا دەخوێنم، ئاواتم بوو کە دایکم سەرکەوتنەکەم ببینێت بەڵام ئەمە قەدەری خوا بوو". ...

زیاتر بخوێنەرەوە

حوزەیران 05 2021

May 29, 2021

by Redwan Adalat

0 Comments

لە: خەڵکی ڕۆژهەڵات

"پازدە ساڵم بوو کە مێردم کرد، بە دڵی خۆم نەبوو و خۆشم نەبوو. هەر لە سەرەتای ژیانەوە کێشە و گیروگرفت دەستیپێکرد و ساڵێکی نەخایاند کە لەیەکتر جودا بووینەوە. لە کۆمەڵگەی ئێمە بە تایبەت لە گوندەکان بە شێوەیەکی زۆر خراپ بە ژنی موجەرەد تەماشا دەکەن، یانی وا بیر ئەکەن تاوانبارین بۆ ئەوەی کە ژیانمان شێواوە. زۆر سەختە لە ناو ئەمانە ژیان بەسەربردن و مەعەزەب دەبی. رۆژێک هەیە لە ژیانم کە هیچکات لە بیری ناکەم، داواکارێکم بۆ هاتبوو و منیش گوتم مێرد ناکەم و حەزم نییە لە ژیانی هاوبەشی. هەر ئەوکاتە دانەیەک لە خزمەکانمان هات و گوتی بۆ مێرد ناکەی نانی شوو و مێردەکەت زۆر بێمنەتترە لە نانی بابت. ئەو کاتە وەختبوو قەلبم دەربێت ئەوەندە ژیان لام ناحەز بوو. پێم سەیربوو باب بۆ نان دان بە منداڵی خۆی ئەبێ منەت لە سەری دابنێ. هەر لەو رۆژەوە بڕیارمدا کە لەسەر پێی خۆم راوەستم و دەستمکرد بە ئیشوکار، لە کەناری ئەوەش دەستمکرد بە دەرس خوێندن. کە کارەکەم دەستیپێکرد بۆ خۆم ژیانی تازەم دروستکرد. ئێستا من بە ئیفتخارەوە لەناو کومەڵگا ژیان بەسەر ئەبەم و ئەوەی کە دەستم لە گیرفانی خۆمدایە ئازادیشی پێمداوە". ...

زیاتر بخوێنەرەوە

مارس 27 2021

May 27, 2021

by Redwan Adalat

0 Comments

لە: خەڵکی باشوور

"تا چوارى سه‌ره‌تاییم خوێندووه‌ و شوكر بۆ خوا ئێستا بۆ نووسین و خوێندنه‌وه‌ پێویستم به‌ كه‌س نابێت و رۆژانه‌ى كاروباره‌كانم راده‌په‌ڕێنم. ته‌مه‌نم 12 ساڵ بوو به‌ عەره‌بانه‌ى قوڕكارى سه‌وزه‌ و میوه‌م ده‌فرۆشت له‌م گوند بۆ ئه‌و‌ گوند. بیرمدێت کە ده‌چوومه‌ هه‌ندێك گوند له‌جیاتى پاره‌ هێلكه‌ و ئاردم وه‌رده‌گرت، زۆربه‌ى خه‌ڵكى گوندیش ده‌ناسم به‌ ئافره‌ت و پیاو و منداڵەکانیشیان، ئه‌وه‌نده‌ رێزم لێده‌گرن له‌كاتى ژه‌مى نیوه‌ڕۆش له‌سه‌ر یه‌ك سفره‌ به‌یه‌كه‌وه‌ نان ده‌خۆین. تا ئێستاش لەو ئیشە به‌رده‌وامم و رۆژانى هه‌ینى هێلكه‌كان له‌ بازارى په‌له‌وه‌رى به‌رده‌ڕه‌ش ساغده‌كه‌مه‌وه‌ و ده‌یكه‌مه‌وه‌ به‌ پاره‌ و بژێوى خانه‌واده‌كه‌م دابین ده‌كه‌م. چوار منداڵم قوتابین و دووانی تریشم بچووكن هێشتا كاتى قوتابخانه‌یان نه‌هاتووه‌. هه‌ركه‌سێك كارێك هه‌ڵبژێرت و به‌ حه‌زه‌وه‌ بیكات دڵنیابه‌ سه‌رده‌كه‌وێت. سه‌ره‌تا به‌ عه‌ره‌بانه‌ كارمده‌كرد، ئێستا پیكابى سه‌روو مۆدێلی 2010 لێده‌خوڕم و خانه‌واده‌كه‌م وه‌كو گوڵ به‌خێوده‌كه‌م و چاوم له‌ ماڵى كه‌س نییه‌. هه‌رچه‌نده كاره‌كه‌م ماندووم دەکات به‌ڵام من زۆر پێی ئاسووده‌م و تاوەکو خوا ته‌مه‌نم پێببه‌خشێت له‌ كاره‌كه‌ى خۆم به‌رده‌وام ده‌بم". ...

زیاتر بخوێنەرەوە

مارس 25 2021

May 25, 2021

by Redwan Adalat

0 Comments

لە: خەڵکی ڕۆژئاوا

"خەڵکی قامیشلۆم، بەڵام بە ئەسڵ خەڵکی جەزیرەی بۆتانم، بەڵام زۆر دەمێکە هاتووین بۆ قامیشلۆ، ئێستا قامیشلۆ بووە بە شوێنی سەرەکەییمان. لەگەڵ دەستپێکردنی جەنگ لە سوریا و رۆژئاوا براکانم هەموویان کۆچیان کرد بەڵام من پێداگریم کرد و مامەوە، وتم ئیش دەکەم و منداڵەکانم دەژیەنم. ماوەی 35 ساڵە کاری چاککردنەوەی پێڵاو و جانتا دەکەم، لە کەسێکەوە فێربووم بە ناوی ئەبو سەلیم، فەزڵێکی زۆری هەیە بە سەرمەوە. لە ڕابردوودا خەڵکی لەسەر جادەکان ئەم کارەیان دەکرد، ئێمە تاکە کەس بووین کە دوکانێکمان کردەوە بۆ کاری چاککردنەوەی پێڵاو و جانتا. دواتر خۆم دوکانێکم کردەوە، و شاگردێکم هەبوو، ئەوە ماوەی 32 ساڵ دەبێت کارم لەگەڵ دەکات، زۆر بە زووی فێری کارەکە بوو بۆیە لەگەڵمدا ماوەتەوە تاوەکو ئێستاش. کارەکەمم زۆر خۆشدەوێت بەڵام چونکە زۆر دادەنیشم پشت تووشی ئازار دەبێت". ...

زیاتر بخوێنەرەوە

مارس 24 2021

May 24, 2021

by Redwan Adalat

0 Comments

لە: خەڵکی ڕۆژهەڵات

"له زانکۆ بووم دایک و باوکم بەساڵاچووبوون، و چونکە منداڵەکانی دیکە یانی خۆیشک و براکانم هیچکامیان نەچوون بەخێویان بکەن، من مەجبوورکرام کە زانکۆ وێڵکەم و بڕۆمەوە بۆ گوند و لای دایک و بابم بمێنمەوە. هەر لەوکاتەوە بوومە گەورەی ماڵ و بوومە دایک و باب بۆ دایک و باوکم. بە جوتیاری ژیانم بە سەر برد، لەو کاتانەدا بە بۆنەی گرانی و دەرامەتی جوتیاری کەم بوو، دەستمکرد بە کرێکاری لە سەدی ئازاد. ئەوکاتە بەبۆنەی ئەوە کە کارم دەسکەوێت و بە عینوانی کچێک کێشەم بۆ ساز نەبێت، جلی کچانەم لەبەر دەرهێنا و جلی پیاوانەم لەبەرکرد و لەگەڵ پۆشینی ئەو جلە لە دنیای کچی خواحافیزیم کرد. لەوکاتەوە تا ئێستا بە ئەم شێوازە ژیانم بەسەربردووە. زۆرجار رەخنەم لێدەگیرێت کە بۆ بەم شێوازەوە دەگەڕێم بەڵام کەس بیری بە ئەوە نەکرد بۆ ئەم شێوازەم هەڵبژاردە". ...

زیاتر بخوێنەرەوە

مارس 22 2021

May 22, 2021

by Redwan Adalat

0 Comments

لە: خەڵکی باشوور

"كاری هونه‌ریم به‌ ئه‌كادیمی نه‌خوێندووه‌ به‌ڵام ماڵپەڕی یوتیوب به‌ مامۆستای خۆم ده‌زانم، چونكه‌ سه‌ره‌تا له‌ یوتیوبه‌وه‌ فێری كاره‌كه‌ بووم. زۆر سه‌رسامم به‌ نیگاركێشە بیانییەکانی وەک (پیكاسۆ- ڤان كوخ - لیۆناردۆ داڤینشی) له‌به‌رئه‌وه‌ی‌ داهێنانیان له‌ شێوەکاری كردووه‌.‌ لای منیش بووه‌ته‌ خولیا کە له‌سه‌ر ڕێبازی ئه‌وان به‌رده‌وامبم و ڕێگایەكی تایبه‌ت به‌ خۆم بدۆزمه‌وه‌ تاوەکو هاوشێوه‌ی ئه‌وان ناوداربم. هه‌موو هونه‌رمه‌ندێك نهێنییەکی خۆی هه‌یه‌ له‌ كاتی وێنەکێشاندا، خه‌یاڵێكی له‌ مێشكدایه‌ له‌ ڕێگای فڵچەکەوە ده‌ریده‌بڕێت. من له‌ سه‌ره‌تادا کە تابلۆم دروستده‌كرد پێنج باڵندەی بچووکم وه‌كو نهێنی كاره‌كه‌م دروستده‌كرد و زۆرجار له‌ ڕێگه‌ی ئه‌و باڵندانه‌وه‌ خه‌ڵک كاره‌كانی منی ده‌ناسییەوه‌. هەندێکیان وه‌كو دیاری دەبەخشم، هه‌ندێكیشیان داوام لێده‌كرێت به‌ پاره‌ دروستی ده‌كه‌م. به‌ڵام بۆ هه‌موو كارێك وایه‌ ئه‌گه‌ر بته‌وێت سه‌ركه‌وتووبیت له‌ كاره‌كانت، ده‌بێت قوربانی بده‌یت به‌شێك له‌ كاره‌كانت وه‌كو دیاری بده‌یته‌ خه‌ڵكانێك کە خولیای هونه‌ریان هەیە‌ بۆ ئه‌وه‌ی هه‌ڵسه‌نگاندن بۆ كاره‌كانت بکەن و ڕەخنه‌ و تێبینی له‌ تابلۆكانت ده‌ستنیشان بكات بۆ ئه‌وه‌ی تۆ زیاتر خۆت ماندووبكه‌یت و ئه‌و‌ هه‌ڵانه‌ دووباره‌ نه‌بێته‌وه‌". ...

زیاتر بخوێنەرەوە

مارس 18 2021

May 18, 2021

by Redwan Adalat

0 Comments

لە: خەڵکی باشوور

"17 ساڵ لەمەوپێش گه‌نج بووم و ژنم نه‌هێنابوو، ماڵم له‌ گه‌ڕه‌كى گۆراڤا بوو. خانووه‌كانى ئەو گەڕەکە كۆن بوون و ئۆتۆمبێل نه‌ده‌گه‌یشتە کۆڵانەکان تا کەلوپەل و زبڵ و خاشاک بهێننە خوارەوە. لە شارەوانی بە گرێبەست بوومە کارمەند و به‌ گوێدرێژ شارم پاک ده‌كرده‌وه‌ و خواردن و كه‌رەسته‌ى بیناسازیشم به‌ گوێدرێژ ده‌هێنایە سه‌ره‌وه‌. خه‌ڵک پێیان دەگوتم ئه‌م كاره‌ مه‌كه‌، تۆ گه‌نجیت و كه‌س ژنت پێنادات. به‌ چاوێكى كه‌م سەیریان دەکردم و گاڵته‌یان پێده‌كردم. خۆشبه‌ختانه‌ ئێستا خاوه‌نی خێزانم و چوار منداڵم هه‌یه‌. بەهۆی ئەوەی کوڕی گەورەی ماڵ بووم و باری ئابووریمان خراپ بوو، مەکتەبم تەواونەکرد و تا پۆلی چواری سەرەتاییم خوێندووە. له‌و ساته‌وه‌ ئه‌و پیشه‌یه‌م هه‌ڵبژاردووە و زۆریش پیشه‌كه‌ى خۆم خۆشده‌وێت، گوێ نادەمە گاڵته‌ى كۆمه‌ڵگە و ته‌نیا پێیان ده‌لێم خوا خێرتان بنووسێت. له‌ ئێستادا به‌ چوار گوێدرێژ لە هه‌ردوو گه‌ڕه‌كى (گۆراڤا و چوسته‌یى) كارى پاكکردنەوە و هه‌ڵگرتنه‌وه‌ى زبڵ و خاشاک دەکەین و نه‌خۆش و پیر و په‌كکه‌وته‌ش ده‌گەیەنینه‌ خواره‌وه‌ تا ئه‌و‌ شوێنه‌ى ئۆتۆمبێل ده‌یگاتێ". ...

زیاتر بخوێنەرەوە

مارس 16 2021

May 16, 2021

by Redwan Adalat

0 Comments

لە: خەڵکی ڕۆژئاوا

"چیرۆکی خۆشەویستی من جوان و پێکەنیناوییە لە هەمان کاتدا، هاوسەرەکەم کاتێک گەنج بوو لەبەر ئەوەی هاوڕێی براکانم بوو بە بەردەوامی دەهات بۆ ماڵمان، هەرگیز هەستم پێنەکردبوو کە خۆشیدەوێم لەبەر ئەوەی من منداڵ بووم. بیرمە کە جوڵەی پێکەنیناوی دەکرد بۆ ئەوەی سەرنجم ڕابکێشێت بەڵام هەرگیز سەیرم نەدەکرد، یان دەچووە سەربانی ماڵە دراوسێکەمان بۆ ئەوەی سەرنجم ڕاکێشێت. هەموو کەسانی دەوورم بە دراوسێ، هاوڕێ و کەسە نزیکەکانمەوە بە خۆشەویستییەکەی ئەویان زانیبوو بێجگە لە خۆم. کاتێک پێمزانی تووشی شۆک بووم لەبەر ئەوەی وەک براکانم وابوو، بۆیە زۆر بە توندی چەند جارێک ڕەفزم کردەوە، زۆر کەسی بە تەمەن تەداخولیان کرد بەڵام هەر ڕازی نەبووم. لە کۆتایدا بە شێوەی جدی بیرم لە بابەتەکە کردەوە وە بە کەسێکی نموونەیم بینی، کەسێک کە زۆر خۆشیدەوێم و زۆر ڕێزم دەگرێت وە ئامادەیە هەموو داواکارییەکانم جێبەجێ بکات. ماوەییەک داستگیران بووین و دواتر هاوسەرگیریمان کرد و ئێستا سێ منداڵمان هەیە. ماوەی 17 ساڵ لەمەوبەر تاوەکو ئێستاش زۆر دڵخۆشم لەگەڵی. هەرگیز پەشیمان نیم لە هاوسەرگیری لەگەڵی لەبەر ئەوەی هەموو هێز و توانا و پاڵپشتی بەردەوامم لەوەوە وەردەگرم". ...

زیاتر بخوێنەرەوە

مارس 09 2021

May 9, 2021

by Redwan Adalat

0 Comments

لە: خەڵکی باشوور

"تەمەنم 67 ساڵە و تاوەکو ئێستا نەچوومەتە قوتابخانە. دەبێت هەموو کات پشت بە خۆت ببەستیت، تا ئێستا بیرم نایه‌ت رۆژێك کارم نەبووبێت. داواشم له‌ كچان و كوڕانی ده‌رچووی خاوه‌ن بڕوانامە ئەوەیە ته‌نیا پشت به‌ دامه‌زراندن نه‌به‌ستن. ده‌بێت مرۆڤ هه‌موو هه‌وڵه‌كانی خۆی بدات، چونكه‌ خودی هه‌موو مرۆڤێک تاقه‌ت و هزرێكی شاراوه‌ی هه‌یه‌ ده‌بێت ده‌ری بكات تاوەکو بوونی خۆی ده‌دۆزێته‌وه‌ و بژێوی خۆی پێدابین بكات. ساڵی 1974 چوومە شاخ و بۆ ماوەی پێنج ساڵ بووم به‌ پێشمه‌رگه‌. ئه‌وکاتە مووچه‌كه‌م پێنج دینار بوو، بەڵام ئێمە‌ پێشمه‌رگایه‌تیمان بۆ كوردایەتی ده‌كرد و لەبەر پاره‌كه‌ نه‌بوو. ئه‌وکات خه‌ڵک وەک ئێستا بێڕەحم نەبوون و بە قەناعەت بوون. دڵخۆشبووین و به‌ هه‌ره‌وه‌زی هاوكاری یه‌كترمان ده‌كرد به‌بێ به‌رامبه‌ر. ئێستاش مووچه‌یەكی خانه‌نشینیم هه‌یه‌ کە ته‌نیا به‌شی جگه‌رەکەم ده‌كات. كاری فرۆشتنی ئاژه‌ڵ و په‌له‌وەر‌یش ده‌كه‌م و پیكابێكم هه‌یه‌ هه‌موو ڕۆژێک روو له‌ مەیدان و بازاڕ‌ی شارێک ده‌كه‌م بۆ ساغكردنه‌وه‌ی قاز، مراوی و مریشکەکان. ژیان له‌گه‌ڵ ئاژه‌ڵ و په‌له‌وەر‌ زۆر سوودبه‌خشه‌وه‌ و ژیانێکی خۆشم هەیە". ...

زیاتر بخوێنەرەوە

مارس 07 2021

May 7, 2021

by Redwan Adalat

0 Comments

لە: خەڵکی ڕۆژئاوا

"کاتێک منداڵبووم باوکم کامێرایەکی بۆ کڕیم و پێی وتم فێری بەکارهێنانی کامێرات دەکەم بۆئەوەی لای کەس کار نەکەیت و کاری خۆتت هەبێت. ساڵی 1975 دەستمکرد بە کار کردن لەناو شاری تەبەقە. ساڵی 1986 کارەکەم گواستەوە بۆ زێدی خۆم (عەفرین) و ستۆدیۆیەکی وێنەگرتنم کردەوە بەناوی (ستودیۆی 21) بەبۆنەی 21 ئازار. ئاسایشی سووریا ڕازی نەبوون کە ئەو ناوەی لێبنرێت، بۆیە ناوەکەیم گۆڕی بۆ (ستۆدیۆی 23) بۆ ئەوەی دەستگیر نەکرێم. لەگەڵ دەستپێکردنی شۆڕش لە سوریا و ڕۆژئاوا و دەرکردنی هێزەکانی حکومەتی سوریا لە عەفرین، ناوی ستودیۆکەم گۆڕی بۆ (ستودیۆ 21). ئەو کاتە سەرەڕای ئەوەی لە ستودیۆ کارم دەکرد، سەردانی گوند و شاخەکانی عەفرینم دەکرد و وێنەم دەگرتن و ئەرشیفم دەکرد. ساڵی 2018 کاتێک تورکیا دەستیکرد بە داگیرکردن عەفرین، کۆچمانکرد بۆ قامیشلۆ. دوای چەند ڕۆژێک لە تۆڕە کۆمەڵایەتییەکان وێنەی ستودیۆکەم بینی سووتابوو، دوای ئەوەش کردیان بە گۆشتفرۆش. زۆربەی ئەرشیفەکانمان لەدەستدا کە لە ساڵی (1975)ەوە کۆمکردوونەتەوە. زۆر بێتاقەت بووم کاتێک ئەو دیمەنەم بینی، تەنانەت ئەگەر یەک ڕۆژیش لە تەمەنم مابێت هەر دەگەڕێمەوە و ستۆدیۆکەم دروستدەکەمەوە". ...

زیاتر بخوێنەرەوە

مارس 05 2021

May 5, 2021

by Redwan Adalat

0 Comments

لە: خەڵکی ڕۆژئاوا

"بۆ یارمەتیدانی هاوسەرەکەم لە مەسرەفی ماڵەوەدا، پێنج ساڵ دەبێت کاری دروومانی دەکەم و خۆشم حەزم لە کارەکەیە. لە ڕێگای ڤیدیۆی یوتیوبەوە خۆم فێری دروومان کرد. دوای ئەوەی کۆچمان کرد لە سەری کانێ و چووینە کەمپەوە. مەکینەیەکم بە کرێ هێنا بۆ ئەوەی دەست بە کار بکەمەوە. هەر لە خێمەکەی خۆماندا دەستمپێکرد، خێمەکەم هەم شوێنی کارکردنم بوو هەم شوێنی ژیانم. عەزی بۆ مشتەریەکانم دەدوورم بە کرێ، لەبەر ئەوەی خەڵکی کەمپەکان داهاتیان کەمە، عەزی بە بڕی 3,000 لیرەی سوری دەدوورم کە لە 1 دۆلار کەمتر دەکات. کۆلێژی پەروەردەم تەواو کردووە لە زانکۆی فورات. بەڵام نەمتوانیوە کار بە شەهادەکەم بکەم بەهۆی فەوزای شەڕ و مانەوەمان لە کەمپدا. هیوادارام کە بگەڕێینەوە بۆ ناوچەکەی خۆمان و لەم کەمپانە بڕۆین، لەبەر ئەوەی ژیانی نێو کەمپ گرانە، هەرگیز بیرم لەوە نەکردبووەوە کە ڕۆژێک لە کەمپدا بژیم". ...

زیاتر بخوێنەرەوە

Newer Posts Older Posts