خەڵکی باشوور - Humans of Kurdistan

تشرینی دووەم 09 2020

November 9, 2020

"کار و کەسابەتی زۆرم ئەنجامداوە و تا ئێستاش هەر بەردەوامم. کەم توڕە دەبم و زۆر پێدەکەنم، ژیان قورسە و لێرە ئازاری زۆرم بینیوە، ڕەنگە ڕۆژگارێک توانای ئەوەم هەبووبێت لێرە بڕۆم و ئەم ژیانەی ئێستام جێبێڵم، بەڵام بۆ بڕۆم؟ پێموایە مرۆڤ لەهەر کوێیەکی ئەم سەرزەمینە بێت بە دەردوو گرفتی جۆراوجۆر گیرۆدە و گرفتارە. باشترین جۆری ژیانکردن ئەوەیە پێبکەنێت، ئەگەر پێنەکەنیت و فشەت بە ئازارەکان نەیەت، بێتاقەتی و خەم خواردن هیچ چارەسەر ناکات. شەوانە کە سەر دەخەمە سەر سەرین بەر لەوەی بخەوم خەیاڵ دەکەم، ئەوەی بە خەیاڵمدا دێت هەندێک جار بزەم بۆ دروست دەکات و هەندێک جاریش دەمگریەنێت. ئەوەی باشە هەژارەکان تێدەگەن کە ژیان هیچ نیە و تا ئەبەد بۆ کەس نابێت، بۆیە هەتا بۆم بکرێت بەس پێدەکەنم." ...

زیاتر بخوێنەرەوە

تشرینی دووەم 06 2020

November 6, 2020

by Redwan Adalat

0 Comments

لە: خەڵکی باشوور

"لەپاش کۆچڕەوەکەی (1991) و دروستبوونی شەڕی براکوژی. کورد بەگشتی لەدۆخێکی یەکجار ناخۆشدا بوو. بەتایبەت بۆ گەنج، خەون و وزەکانی هەمووی قەتیس بوبوو، جارێ هەر بۆ چینی هەژار هیچ هۆکارێکی دڵخۆشبوون نەمابوو. لەو کاتەدا چەند تێکستێکم بۆ هونەرمەند (ڕەشوان شێخانی) نووسی. گۆرانییەکان لەو کاتەدا وەک حەشیش ئارامکەرەوە بوون بۆ عاشقە هەژارەکان. من کە نەوەی (شێخ جامی)بووم، چاوەڕوان نەکراو بۆ خەڵک کە گۆرانی (نامەیەک، خەبەرێک نەهات لەلای تۆ، ئەی بۆ وات کرد بۆ ) تێکستی من بن. بیرمە کاسێتەکەم بردە لای باوکم و لێمدا پێم گوت ئەوانە هەمووی تێکستی منن، تاهێزی هەبوو زلەیەکی لەبنی گوێی دام، گوتی نەوەی شێخ و ئەوشتانە شورەییە. هونەر لای من ئەوەندە پیرۆز بوو تەوهین و قسە زبرەکانی بابم نەبونە ڕێگر لەبەردەم قوڵبوونەوەم لەناو هونەر. ئێستاش تەمەنێک تێپەڕیوە بەسەر ئەو گۆرانییانە بەڵام من وەک شێخێک هەر شانازیان پێوە دەکەم." ...

زیاتر بخوێنەرەوە

تشرینی دووەم 05 2020

November 5, 2020

by Redwan Adalat

0 Comments

لە: خەڵکی باشوور

"لە ئێستادا لە قۆناغی چوارەمم لە کۆلێژی کشتوکاڵ، ئەو کاتەی لە زانکۆی سەڵاحەدین وەرگیرام بۆ کچێکی بیست ساڵانەی وەک من لە ناوچەیەکی ساردی شاخاوی وەک باڵەکایەتی بۆ ناو هەولێر زۆر قورس بوو. قبوڵکردنی ئەو جەنجاڵییەی شار بە بەراورد بەو ئارامییەی باڵەکایەتی یەکجار دژوار بوو. جگە لەوەش لەوێ لەژێر سایە و سێبەری خێزان بووم لە هەموو ڕوویەکەوە. بەڵام لێرە هەڵگرتنی بەرپرسیارێتی ژیانی خۆم لە ئەستۆی خۆم بوو. جگە لەوە کۆمەڵێک زەحمەتی تر هەبوون کە تووشی پاڵەپەستۆ و شڵەژانی دەروونییان کردبووم، زۆر جار لە خۆمم دەپرسی، ئەوە منم لە ناوەڕاستی ئەم شارە گەورەیەدا بە تەنیا کاری خۆم بەڕێدەکەم؟، بەڵام شکور وردە وردە بە ناسینی کەسی نوێ و دۆزینەوەی هاوڕێی باش توانیم ڕابێم لەگەڵ بارودۆخەکە، ئێستا دوای چوار ساڵ هەولێر بۆتە بەشێک لە ژیانم و ئەو شارەم زۆر خۆش دەوێت. بە دوور کەوتنەوە لێی بەجۆرێک بیری ئەو شارە دەکەم کە هەرگیز لەو باوەڕەدا نەبووم نەک چوار ساڵ بەڵکو چوار هەفتەش لێی بمێنمەوە." ...

زیاتر بخوێنەرەوە

تشرینی دووەم 03 2020

November 3, 2020

by Redwan Adalat

0 Comments

لە: خەڵکی باشوور

"کارکردن لە ڕاگەیاندن ئاواتی من بوو. کاتێک قۆناغی شەشم تەواوکرد ئەندامانی ماڵەوەو کەسانی چواردەورم هەموویان دژی ئەوەبوون بەشی ڕاگەیاندن هەڵبژێرم. هەتا زیاتر وادەی فۆڕم پڕکردنەوە نزیکتر دەبووەوە، زیاتر فشاری دەروونیم قەلەقی دەکردم. دەمگوت چۆن بتوانم خێزانەکەم ڕازی بکەم بۆ ئەوەی بتوانم ئەوە هەڵبژێرم کە خۆم دەمەوێت؟ بیرمە هەموو دژم بوون. تەنیا یەک هاورێم نەبێت کە دەردە دڵی خۆم بۆی باسکرد، بوو بە پاڵپشتم و هانیدام. وایکرد زیاتر لە جاران پێداگیربم لەسەر خەونەکەم و هەرگیز کۆڵ نەدەم. دواجار لە خێزانەکەشم برا گەورەکەم بووە پاڵپشت و هاندەرم. ئەوەی زۆرجار بە هاورێ و هاوپیشەکانمی دەڵێم ئەوەیە "سەرکەوتن پەیوەست نییە بە پلەو پۆستی بەرز، بەڵکو پەیوەستە بەوەی خولیاو ئارەزووتە، دەڵێم هەوڵ بۆ ئەوە بدەن و ئەوە هەڵبژێرن کە لەناخی دڵەوە دەتانەوێت و حەزی پێدەکەن". ئێستەش کە لە قۆناغی کۆتایی ئەو بەشەم، هەموو ساڵێک بە پلەی سێیەم دەرچووم، وە وەک پەیامنێر کاردەکەم. ئەوانەشی کە دژم بوون و دەیانگوت ناتوانیت، ئەوەتا دەبینن کە لەوە زیاتریش دەتوانم." ...

زیاتر بخوێنەرەوە

تشرینی دووەم 01 2020

November 1, 2020

by Redwan Adalat

0 Comments

لە: خەڵکی باشوور

"لە تەمەنێکی زۆر لاویدا هاوسەرگیریم کرد، زۆر کەس پێیان وایە من هەڵەم لەو تەمەنە کەمەدا چوومە ناو ئەو پڕۆسەیە، بەڵام هەرگیز پەشیمان نیم لەو بڕیارەم و زۆر خۆشحاڵم لەو ژیانەی ئێستا کە تێیدام. کاتێک لەگەڵ منداڵەکانم دەچمە هەر شوێنێک وادەزانن خوشک و برای بچووکمن چونکە ڕووخسارم زۆر لەوە بچووکترە کە خاوەنی دوو منداڵ بم. زۆرم پێ خۆشە کە هێشتا لەسەر هێزی خۆم بم و کوڕەکەم ببینم ئەویش گەنج بێت. هەر ئەوەش هۆکار بوو کە زوو ژنم ‌هێنا، دەمویست منداڵەکانم لەگەڵ خۆم گەورەبن و هاریکارم بن. هاوسەرگیری سونەتی حەیاتە هەر دەبێت بیکەیت زوو یان درەنگ، بۆیە بەڕای من هەتا لەسەر هێز و بازووی خۆتی ئەو بڕیارە بدەیت سوودی خۆی دەبێت بۆت." ...

زیاتر بخوێنەرەوە

تشرینی یەکەم 31 2020

October 31, 2020

by Redwan Adalat

0 Comments

لە: خەڵکی باشوور

"من نەوەی مشکۆی گۆرانیبێژم، زۆر شانازی بە باپیرمەوە دەکەم چونکە بەڕاستی ئەو ڕێز و حورمەتەی هەمانە لەناو خەڵکیدا و بەتایبەت لە هەولێر، بەشێکی زۆری بۆ ئەوە دەگەڕێتەوە کە نەوەی ئەوین. لەو تێڕوانینەی خەڵک بۆ ئێمە ئەوەم بۆ بەدیار دەکەوێت کە هونەرمەندانی کۆن خاوەنی هونەر ڕاستەقینە بوون بەجیاواز لە هونەرمەندانی سەردەم، ئێستا سەیر دەکەی خەڵکی خودی هونەرمەندەکە ناناسێ. ئەوانەی لە تەمەنی مشکۆی باپیرمدا بوون و ئێستا ماون پێم دەڵێن تۆ لە هەموو نەوەکانی زیاتر بەو دەچیت، هەر لەبەر ئەوەشە ئەو هاوتەمەنانەی ئەو کە ماون منیان خۆشدەوێت، سەیر لەوەدایە ئەوەندە لەو دەچم کەچی بەداخەوە دەنگم وەک ئەو خۆش نیە." ...

زیاتر بخوێنەرەوە

تشرینی یەکەم 30 2020

October 30, 2020

by Redwan Adalat

0 Comments

لە: خەڵکی باشوور

"دوو ساڵ زیاتر دەبێت خەریکی گوڵفرۆشیم، پێشتر شارەزایی ئەوەم نەبوو کە هەر ڕەنگە و مانایەکی خۆی هەیە. بەڵام ئێستا سەرەڕای ئەوەی ڕەنگەکان هەموو دەناسم، بۆنی گوڵەکانیش دەناسمەوە. بڕۆم بۆ هەر ماڵێک ئەگەر گوڵدان و باخچەیان هەبێت دەزانم هەستی ئەندامانی خێزانەکە چۆنە. بڕۆم بۆ هەر شوێنێک حەزدەکەم گوڵ و گوڵدان ببینم. کە بووم بە گوڵفرۆش هاوسەرگیریم نەکردبوو، ڕۆژانە خەڵک بۆ بۆنە و یادەکانیان بۆ گوڵ کڕین دەهاتن بۆ لام، بەتایبەت ئەوانەی گوڵیان بۆ خۆشەویست و هاوسەرەکانیان دەکڕی، زۆر سەرەنجیان ڕادەکێشام. ئێستا کە خێزاندارم بۆ ئەوەی هاوسەرەکەم بزانێت چەندم خۆشدەوێت، منیش زۆر جار گوڵی بۆ دەبەم بە دیاری، بۆ هەر گوڵێکیش بە پارە لە خۆمی دەکڕمەوە، بەم جۆرە ویستوومە قیمەت بۆ گوڵەکە و هاوسەرەکەم دانێم. من هاوسەرەکەم زۆر خۆشدەوێت و لەهەمان کاتیشدا گوڵەکانیشم خۆشدەوێت." ...

زیاتر بخوێنەرەوە

تشرینی یەکەم 30 2020

October 30, 2020

by Redwan Adalat

0 Comments

لە: خەڵکی باشوور

"هەستم دەکرد لە خوێندندا سەرکەوتوو نابم بۆیە بڕیارمدا واز لە خوێندن بێنم و دەست بکەم بە کارێک، سەرەتا وەک شاگردێک کارم دەکرد لە سەرتاشخانەیەک و خۆشم زۆرم حەز بە سەرتاشی بوو. بەردەوام بووم هەتا توانیم سەرتاشخانەی خۆم هەبێت و ببمە خاوەن کاری خۆم، بەڵام پاش ماوەیک بەهۆی کێشیەکەوە دوکانەکەم نەما. کۆمەڵێ کاریترم کرد، بەڵام سوودیان نەبوو بۆ من، بەو جۆرە نەبوون کە من دەمویست، بڕیارمدا بەڕێگەی قاچاخ سەفەر بکەم، لەوەشدا کۆمەڵێ کێشە هاتە بەردەمم و نەمتوانی سەفەر بکەم. پاش ماوەیەک گەڕامەوە سەر حەزەکەی خۆم و هەرچۆنێک بوو سەرتاشخانەکەم دانایەوە، ئاواتی زۆرم هەیە پێی بگەم و ڕێگری زۆریش هەیە بەڵام کۆڵ نادەم و بەردەوام هەوڵی بۆ دەدەم، گرنگترین شت ئەوەیە بە خۆت بڵێی مەڕوخێ." ...

زیاتر بخوێنەرەوە

تشرینی یەکەم 27 2020

October 27, 2020

by Redwan Adalat

0 Comments

لە: خەڵکی باشوور

"زیاتر لە 11 ساڵە سەرتاشم، من و زۆربەی خزمەکانیشم لەژێردەستی برایەکەم فێری ئەو کارە بووین. خودی خۆم لە ماوەی کارکردنمدا نزیکەی حەفتا بۆ هەشتا کەسم فێری کارەکە کردووە. جگە لەوەی لەپێناو خودا ئەوانم فێرکردووە و دڵخۆشم پێی، خۆشحاڵیشم کە زۆر لە فێرخوازەکان بەوەفان، ئێستاش زۆربەیان خاوەن دوکان و کاری خۆیانن کە دەچمە لایان من بە مامۆستای خۆیان دەزانن و تەنانەت شەرم دەکەن لەبەردەم من کار بکەن. هەرگیز بەموشتەریم نەگوتووە ئەوەنە پارەم دەوێت یان ئەو بڕە پارەیە کەمە، قەناعەتم بە هەموو بڕە پارەیەک هەیە کە وەریدەگرم، بۆیە پێم وایە ئەوەی هەمە لە ژیانمدا لە بەرەکەتی قەناعەت کردنە." ...

زیاتر بخوێنەرەوە

تشرینی یەکەم 26 2020

October 26, 2020

by Redwan Adalat

0 Comments

لە: خەڵکی باشوور

"جاران کە سەیری فیلمی کاوبۆییەکانم دەکرد وامدەزانی کە ئالەتی گیتار پەیوەستە بە کاتی جەنگ و ڕووبەرووبوونەوەی جەنگاوەران. سەرەڕای ئەوەی خۆم بەشی ئەندازیاری تەلارسازیم تەواو کردووە و ماوەیەک لەو بوارەدا کارم کردووە، بەڵام دواتر میوزیکم هەڵبژارد و خۆم فێری گیتار کرد، ئێستا کە خۆم ژەنیاری گیتارم، بە پێچەوانەی ئەو بیرکردنەوەی جارانم بیر دەکەمەوە. ئێستا مامۆستای باخچەی منداڵانم، گیتار دەژەنم و لەگەڵ منداڵەکان سەما دەکەین، سەمای سامبا و فلامینگۆ، هەڵدەپەڕین و هەڵبەز و دابەز دەکەین. کە منداڵەکان بەم شێوەیە دەبینم دەزانم لە ڕابردوو چیم لەدەست داوە کە منداڵبووم، بۆیە بۆ قەرەبووکردنەوەی منداڵیم هەندێک جار حەزدەکەم سەراپای جەستەم گوێچکە بێت بۆ گوێ گرتن بۆ مۆسیقا و گۆرانییەکان." ...

زیاتر بخوێنەرەوە

تشرینی یەکەم 23 2020

October 23, 2020

by Redwan Adalat

0 Comments

لە: خەڵکی باشوور

"کە لە مەکتەب بووم حەزم لە دەرسە زانستییەکان بوو، بەڵام کەتێک تاقیکردنەوەی بەکەلۆریم کرد 63م هێنا، دەرەجەیەکی زۆر کەم بوو، کۆمەڵێک کۆلێژی نزم وەریان دەگرتم کە من هیچیانم بەدڵ نەبوو، ئیتر چوومە بەشی کوردی لە زانکۆی بەغداد چونکە خۆم حەزم بە بینینی بەغداد دەکرد، دوای چوار ساڵ تەواوم کرد بەڵام هێشتا حەزم لە بەشێکی زانستی بوو. دوای چەند ساڵێک لە دەرس وتنەوە بووم بە بەڕێوەبەر لە قوتابخانەی کاوە. ئەم هەموو کاتە تێپەڕی بەڵام هێشتا حەزم لە خوێندن بوو بۆ بەشی زانستی، ئەوەبوو ڕۆژێک نووسراوێکمان بۆ هات دەورەیەکی بیریکاری ئەکرێتەوە بۆ مامۆستایانی زانستی لەگەڵ ئەو کەسانەی حەزیان لێیە، خێرا ناوی خۆم تۆمارکرد و گەشتم بە ئاواتەکەی خۆم، لە دوای تەواوبوونی دەورەکە هەتا ئەو ڕۆژەی خانەنشین کرام وانەی بیرکاریم وتەوە." ...

زیاتر بخوێنەرەوە

تشرینی یەکەم 21 2020

October 21, 2020

by Redwan Adalat

0 Comments

لە: خەڵکی باشوور

"کاتێک کەسێک دەکەی بەسەر مەشقی خۆت لەژیان پێت خۆشە زۆربەی ژیانت وەکو ئەو لێبکەی تەنانەت لە قژ و جلوبەرگیشدا. منیش لەبەر خۆشەویستیم بۆ مارسیلۆی بەڕازیلی قژم وەک ئەو لێکردووە، هەرچەندە لەو ناحیە بچووکەی خۆمان بەردەوام دەکەومە ژێر ڕەخنە و توانج. زۆر جار گوێبیست دەبم پێم دەڵێن ئەڵێی ژنە یان ئەڵێن زۆر عەیبە بۆتۆ قژت بەم شێوە هێشتۆتەوە، جارێک مامۆستاکەم لە قوتابخانە پێی وتم احمد ئەگەر قژت چاک بکەی وەعد پانزە دەرەجەت پێ ئەدەم منیش وتم مامۆستا ئەگەر ئەمساڵ دەریشم بچێنیت، قژم چاک ناکەم، باوکم زۆر پشتگیریم دەکات پێی خۆش نیە چاکی بکەم بەڵام دایکم بەردەوام شەڕیەتی لەگەڵم ئەڵێ ئەبێت قژت چاک بکەی." ...

زیاتر بخوێنەرەوە

Newer Posts Older Posts