خەڵکی ڕۆژهەڵات - Humans of Kurdistan

ئیلول 24 2020

September 24, 2020

"هیچ کات لەوە تێنەگەیشتووم کە بۆچی یاری کردن لای گەورەکان خۆشنییە و وشەی دانیشە لە دەمیان نابڕێت! ئێستا کە پشووی هاوینەیە جگە لەوەی یاری بکەین ئیشی ئێمە چییە؟ لەوەتەی کورۆنا هەیە، هاوپۆلەکانی خۆمم نەدیوە و پێکەوە نە تۆپێنمان کردووە نە یاری. بە تاقی تەنها لەگەڵ دایکم بە ئینتەرنێت وانەکانم خۆیندووە و ڕۆژانێکی زۆر ناخۆش بوو و تێپەڕین. ئێستا کە خوێندن کۆتایی هاتووە، هاتووینەتە ئەم باخەمان دوور لە شارە بەڵکو لە کۆرۆنا دوور بین. دایکم دەڵێ ئەوەندە لە بەر هەتاو یاریت کردووە ڕەش هەڵگەڕاویت." ...

زیاتر بخوێنەرەوە

ئیلول 22 2020

September 22, 2020

by Redwan Adalat

0 Comments

لە: خەڵکی ڕۆژهەڵات

"هەموو کاتێک ئارەزووم کردووە کە منداڵم بوو، زیاتر وەک هاوڕێیەک بم لەگەڵیدا نەک باوک. پێمخۆش نییە شەرمم لێ بکات، یان لێم بترسێت. یاخود ئەو شێوازە هەڵسوکەوتانەی کە بە داخەوە زۆربەی باوکان و دایکان لە گەل منداڵەکانیان دەیکەن. ئێستا کوڕێکم هەیە و بووم بە باوک، هەروام کردووە و هەوڵمداوە لەگەڵمدا هەست بە ئاسوودەیی بکات. نێوانمان زۆر خۆشه، ڕێگام پێداوە چی دەوێت پێم بڵێت و هیچم لێنەشارێتەوە، منیش تا بۆم بکرێت بۆی دابین دەکەم و بێدڵی ناکەم. "هاکان" زۆر ئاسوودەیە کاتێک لەگەڵمدایە، وەک هاوڕێکانی کۆڵانی هەڵسوکەوتم لەگەڵ دەکات. ئاواتم ئەوەیە کوڕەکەم بڕواتە زانکۆ و پاشان ببێت بە مامۆستایەک یان پزشکێکی باش و لە ئیشی ناو بازاڕ بەدوور بێت." ...

زیاتر بخوێنەرەوە

ئیلول 20 2020

September 20, 2020

by Redwan Adalat

0 Comments

لە: خەڵکی ڕۆژهەڵات

"سێ ژنم هێناوە، بیست منداڵم هەیە و ئەو بیست منداڵە ئێستا بونەتە سەد و دوو نەفەر. دەربەدەری زۆرم کێشاوە لە ئێران و عێراق، بۆیە ئێستا زۆر پەشیمانم و هەڵەبووم کە ئەو کاتە سێ ژنم هێنا. ئێستا لەجێی چەند کەسێک خەفەتی سەد و دوو نەفەر ئەخۆم. کاتێک گەنج بووم ئەوندە جوان بووم، نەمدەتوانی دەست بەخۆمدا بهێنم و بڕۆمە دەر و لەناو بازاڕ هاتوچۆ بکەم بەڵام ئێستا ئاوام لێ هاتووە. حەفتا وپێنج ساڵ تەمەنمە و ئەگەر ئێستاش تۆزێ جوانتربام ژنێکی دیکەشم دەهێنا بەڵام ئێستا خەفەتم ئەوەیە ناتوانم ژنێکی تر بهێنم. جاران هەر لە دوورەوە کە ئەهاتم سڵاویان لێ دەکردم و پێیان ئەوتم توخوا جوابمان بەرەوە بەڵام ئێستا سڵاویش ئەکەم کەس جوابم ناداتەوە." ...

زیاتر بخوێنەرەوە

ئیلول 16 2020

September 16, 2020

by Redwan Adalat

0 Comments

لە: خەڵکی ڕۆژهەڵات

"خوا منداڵی پێ نەداین، هەرچی خواش نەیدا هیچی لەگەڵ ناکرێت. چل وپێنج ساڵە ژنم هێناوە و بە درێژایی ئەم ساڵانە دوو بە دوو لەگەڵ خێزانم پێکەوە ژیاوین و لەسەر سفرەیەک بووین. نە دەنگی منداڵێکمان بیست، نە زانیمان تامی دایکایەتی و باوکایەتی چییە. پیربووم و حەفتاوحەوت ساڵ تەمەنمە، تازە کرێکاریم پێناکرێت، بۆیە وا بۆ سێ ساڵ دەچێت کوانووی هەنگ دەگەڕێنم و لایان دەمێنمەوە. لە مانگێکدا سێ ڕۆژ دەڕۆمەوە ماڵەوە و سەری مانگ موچەیەکی کەم لە خاوەنی هەنگەکان وەردەگرم. خێزانم چەند نەخۆشییەکی هەیە و لە ماڵەوە کەوتووە، جاروبار هەڵدەسوڕێ و تا ڕادەیەک کار و باری خۆی بە ڕێدەکات. سەرەڕای ئەمانە گوێ نادەمێ، گەر هەرئاوا بمێنین وخۆم بتوانم کارێک بکەم زۆر باشە. هەنگ زۆر پێوەیداوم، هەنگەوانی کارێکی ئاسان نییە و زۆر هەستیارە، منیش زۆری لێ نازانم و خاوەنی هەنگەکان زیاتر سەری لێدەردەچێت." ...

زیاتر بخوێنەرەوە

ئیلول 12 2020

September 12, 2020

by Redwan Adalat

0 Comments

لە: خەڵکی ڕۆژهەڵات

"هەر لە منداڵییەوە ئارەزووی زمانی ئینگلیزیم دەکرد، پێمخۆشبوو بزانم چێ ئەڵێن کاتێک قسە دەکەن. لەو کاتەوە زمانەکەم باشبوو، بۆیە هەموو ئاواتم ئەوەبوو گەورە ببم و بڕۆمە زانکۆ و زمانی ئینگلیزی بخوێنم. دواتر ماوەیەکی زۆر لە قوتابخانەکانی سنە وانەی ئینگلیزیم دەوتەوە. فێربوونی زمانێکی دیکە وای لە من کرد کە بە فەرهەنگی جێگایەکی تر ئاشنا ببم و زیاتر دنیا ببینم. بەڵام ئەگەر ئەوکات هەمان بیروباوەڕی ئێستام هەبووایە، زمانی ئینگلیزیم لە پاڵ شتێکی دیکەدا دەخوێندن. لەگەڵ ئەوەی کە زۆر کەڵکم لێوەرگرتووە، بەڵام پەشیمانم. هەمیشە ئارەزووی تەنهاییم کردووە و بەردەوام تەنها بووم. بەڵام لەم چەند ساڵەی ڕابردوودا چەند کتێبێکم دەربارەی خۆناسی خوێندەوە، واملێهات لەو تەنهاییە بێمە دەرێ و زیاتر لەگەڵ دۆستانمدا تێکەڵ ببم. ئێستا زۆر دەچمە دەرێ و بەردەوام حەز بە کۆبوونەوەی هاوڕێیان و ناو خەڵکی دەکەم. تەنانەت ئارەزووی ئەوە دەکەم گەشت بکەم و خەڵکی نوێ بناسم و ئاشنای کەسانی دیکە ببم." ...

زیاتر بخوێنەرەوە

ئیلول 11 2020

September 11, 2020

by Redwan Adalat

0 Comments

لە: خەڵکی ڕۆژهەڵات

"ئێستا کە گەورە بووم حەزدەکەم بەرگی یادەوەری منداڵیم ھەڵبدەمەوە و بگەڕێمەوە ئەو ساتانەی منداڵی و وردە وردە بڕۆمە ناو خەیاڵ و باسی ئەو کاتە. لە منداڵیدا حەزم لە دووچەرخە بوو، بەڵام سێ چەرخەیەکمان هەبوو دادەم زۆرتر سواری دەبوو. من ھەر نەمتوانی دووچەرخە فێر ببم، چوونکە ئیتر وردە وردە گەورە بووم و کۆمەڵگای ئەو کات پێی قبوڵ نەبوو. ئەو خۆزگەیە لە دڵمدا ھەتا ئێستا کە تەمەنم بیستوهەشت ساڵە مایەوە. مانگێک دەبێت فێری دووچەرخە بووم، بەڵام تازە تامی ئەو کاتەی منداڵی نادات، ئارەزووەکان کە مردن ئیتر زیندووکردنەوەیان زەحمەتە. ئێستا کە گەورە بووم پێم خۆشە بگەڕێمەوە سەردەمی منداڵی و لەگەڵ ھاوڕێکانم وەک جاران یاری خۆشاردنەوە بکەین و بە خێرایی ئەم ژیانە ببوایە بە چاو تروکانێک و ئەم ڕۆژانەمان نەدیبایە." ...

زیاتر بخوێنەرەوە

ئیلول 10 2020

September 10, 2020

by Redwan Adalat

0 Comments

لە: خەڵکی ڕۆژهەڵات

"لە تەمەنی منداڵییەوە خولیای نوسینم هەبووە، منداڵێکی چالاک بووم و هەمیشە ئارەزووی نوسین و خوێندنەوەم کردووە. بەڵام بەداخەوە لە کاتی خۆیدا هیچ هاندەر و پاڵپشتێکم نەبوو. کاتێک خانەنشین بووم، هاوڕێ و خوشکی خوالێخۆشبووم (مریەم قازی) ئێوارە خوانێکی بۆ ڕێکخستم و بانگهێشتی کردم. لەوێ کەوتینە ناو باسی ئەدەب و نوسینەوە، پێی وتم تۆ کەسێکی هەست ناسکیت و بەهۆی ئەوەی پێشتر مامۆستا بوویت و ئێستا لە قوتابخانە و قوتابییەکانت دابڕاویت، هەوڵدە هەستەکانی خۆت بنوسیتەوە. مریەم بووە پاڵپشتێکی گەورەی ژیانم و ماڵی تاریکی دڵمی ڕووناککردەوە و بە نوسینی شیعر بۆ منداڵان لە تەمەنی چل و سێ ساڵیدا دەستم بە نوسین کرد. منیش وەک هەموو ژنێکی تری ئەم کۆمەڵگایە دەستاری ژیان زۆری هاڕیوم، بۆیە ژیان ئەوەندە رێگای داوم و هێشتا نەمتوانیوە نوسینەکانم وەک کتێب چاپ بکەم، بەڵام بەشێک لە نوسینەکانم لە گۆڤارەکانی ڕۆژهەڵات و باشوری کوردستاندا بڵاوبۆتەوە." ...

زیاتر بخوێنەرەوە

ئیلول 06 2020

September 6, 2020

by Redwan Adalat

0 Comments

لە: خەڵکی ڕۆژهەڵات

"زۆر حەزم لە گوڵ و سەوزاییە، بێتاقەتیم پێیان دەردەچێت. لە ماڵەکەمدا جۆرەها گوڵم چاندووە و ڕۆژانە ئاویان دەدەم. ساڵی پار کە گوڵەکانم ئاو دەدا، تۆوی گوڵەکان بە چۆڕەی ئاوەکەوە ڕژابوونە درزی دیواری بەردینی ماڵەکەم، کەچی ئەمساڵ ڕووابون. کە ئەوەم دی دەسم لێهەڵنەگرتن و بەردەوام ئاومدان. یەک بە یەک گوڵی ڕەنگاوڕەنگ خۆیان دەرخست و لە درزی بەردەکانەوە هەڵکشان. ئێستا بوونەتە جێی سەرنجی ڕێبواران و زۆر لایان جوانە، هەمیشە لێم دەپرسن چۆن ئەمەم کردووە. لە ڕاستیدا ڕێکەوت بوو و ئەم جوانییە خۆی خوڵقا، بەڵام وەک بیرۆکەیەکی لێهاتووە بۆ چاندنی گوڵ و گوڵزار بەم شێوازە، چونکە دیمەنێکی ناوازە دەخۆڵقێنێت." ...

زیاتر بخوێنەرەوە

ئاب 30 2020

August 30, 2020

by Redwan Adalat

0 Comments

لە: خەڵکی ڕۆژهەڵات

"بەیانییان پێش ئەوەی لەخەو هەستێت دەچمە دەرەوە و هەرچۆنێک بێت خۆمی لێدەدزمەوە. بەڵام کە نیوەڕوان دەگەڕێمەوە دەبێت لەگەڵ خۆم بیبەم بۆ سەرکار و لەسەر ماتۆڕەکە جوان دەستدەگرێت و ڕاهاتووە وریای خۆی بێت. چەندەها جار پێیان وتووم کە ئەم کارە مەترسیدارە، بەڵام ئەگەر لەگەڵ خۆم نەیهێنم دنیا دەهێنێتە سەرمان. چەند ساڵێکە لەگەڵ باوکم تووە فەرەنگیمان چاندووە، لەلای من و باوکم دەمێنێتەوە تا نزیکی ئێوارە و خۆی بە تووەکانەوە مەشغوڵ دەکات. لایەنی خراپی ئەوەیە خۆی پیس دەکات و بێتاقەت دەبێت، ئیتر ئەبێت بیبەمەوە بۆلای دایکی. سەرەڕای ئەوەش بەیانی دیسان خۆی ئامادە دەکات بۆ ئەوەی لەگەڵم بێتەوە بۆ کار. بەڵام زۆر دڵخۆشم کە هەر لە ئێستاوە هاودەمی منە." ...

زیاتر بخوێنەرەوە

ئاب 27 2020

August 27, 2020

by Redwan Adalat

0 Comments

لە: خەڵکی ڕۆژهەڵات

"لە بیجار لە دایکبووم، شارێکی بچووکی ڕۆژهەڵاتی کوردستانە. بە منداڵی خوێندنم بەهۆی هاروهاجی زیاد لەحەدم درێژەی نەکێشا و هەرزوو وازم لە خوێندن هێنا. هەر لە سەرەتاییەوە بە کاری جیاجیاوە خەریکبووم، لە شاگردی چایخانەوە بیگرە تا مەئموور و کرێکاری بەنداوی ئاو. سەرکێشییەکانم بە زیندانیان گەیاندم و ئاشنایان کردم بە خەڵکی جۆراوجۆری کۆمەڵگە. بەڵام بەردەوام هەوڵمداوە بە پاکی بمێنمەوە و گیرۆدەی کارێک نەبم کە پەشیمانی لەدواوەبێت، هەرچەندە ڕواڵەتم پێچەوانەی ئەوە نیشاندەدات. ئەوە چەند ساڵێکە سەرقاڵی کاری ئاسنگەریم، بژێوی ژیانمی پێپەیدا دەکەم و کارەکەمم خۆشدەوێت. خۆم ناوم ئیبراهیمە، بەڵام ئەوەندە بە ئیبرا بانگیانکردووم، بیرم نەماوە ناوی خۆم لە ئەسڵا چییە." ...

زیاتر بخوێنەرەوە

ئاب 23 2020

August 23, 2020

by Redwan Adalat

0 Comments

لە: خەڵکی ڕۆژهەڵات

"وانەیەک کە ژیان بەمنی داوە ئەوەیە، کە کات و وزەم بە بەراورد کردنی خۆم لەگەڵ کەسانی تردا بە فیڕۆنەدەم. کاتێک کارێکت کردووە و دڵخۆشیت، قەد مەجال مەدە کە بیروڕای کەسێکیتر ئەو دڵخۆشیەت لاواز بکات. ئەگەر چی مومکین نیە بە تەواوی سێبەری بیروڕای خەڵک لە سەر خۆت دوور بخەیتەوە، بەڵام دەکرێ ئاسەواری لەسەر خۆت کەمبکەیتەوە و بەجدی نەیگریت. بەم شێوازە خەڵکانی تر چی دەکەن و چی دەڵێن کەیفی خۆیانە. تۆ گرینگیت دەگەڕێتەوە بۆ ئەو شتانەی کە لە دروونی خۆتدایە، جیا لەوەی کە ڕای گشتی لە سەر تۆ چیە. یەک خاڵ سەلمێنراوە کە ئەویش ئەوەیە: تۆ نە بەو عەزەمەتەیت، وە نە بەو لاوازیەیت کە باس دەکرێیت." ...

زیاتر بخوێنەرەوە

ئاب 21 2020

August 21, 2020

by Redwan Adalat

0 Comments

لە: خەڵکی ڕۆژهەڵات

"یەکەم جار کە لەسەر پەردەی سینەما فیلمم بینی، بۆم دەرکەوت کە کاتێک سەیری فیلمێک دەکەیت، دەکرێ بگریت یان پێبکەنیت. هاوکات دەکرێت وانەیەک بۆ ژیان وەربگریت. هەر ئەوکاتە هەستمکرد سینەما ئەو دونیایەیە کە دەمەوێت تێیدا بژیم. من لە بنەماڵەیەکدام کە هۆگری کتێب و موزیک و سینەمان، بۆیە ئاسایی بوو منیش حەز لە هونەر بکەم. ئامانجم ئەوەیە ببم بە ئەکتەری سینەما، بۆیە ساڵێک دەبێت لە شانۆ خەریکی ڕاهێنانم وسەرقاڵی فێربوونی بنەماکانی بوون بە ئەکتەرم. شانۆکار لە بەردەم کامێراشدا دەتوانێت ئاستێکی باش پێشکەش بکات و ترسی لە چاوی کامێرا نیە. باشترین ئەکتەرەکانی سینەما پێشتر ڕۆژگارێک شانۆکارێکی باش بوون و دواتر ڕێگەیان بۆ خۆشبووە کە لە سینەمادا دەربکەون." ...

زیاتر بخوێنەرەوە

Newer Posts Older Posts