"لە منداڵییەوە ھەركاتێک لە تیڤی تەماشای كارتۆنم دەكرد، ئەو كارتۆنانەی کە ئەسپیان تێدابوو زیاترم چێژم لێدەبینین و ھەستێكی خۆشییان دەدامێ. ھەموو كات لە خەیاڵی خۆمدا ئەسپێكی سپیم ھەبوو و قسەم دەگەڵ دەكرد، دەستم بە پشتیدا دەهێنا، خۆراكم بۆ دادەنا و مووی سەریم دادەهێنا، سواری دەبووم و دەڕۆیشتم و دەگەڕام.
لە تەمەنی حەوت ساڵیدا، چووین بۆ گوندەکەی ماڵی دایكم و لەوێ بۆ یەکەمجار لە نزیکەوە ئەسپم بینی. بێئەوەی لێی بترسم یاخود نامۆبم پێی، ڕاستەوخۆ چوومە لای و دەستم پێداھێنا و داوام لە بابم کرد کە سوارمبکات. ئەوەندە كامەرانبووم، وامدەزانی لە ئاسماندا ھەڵدەفڕم!
لەدوای ئەوكاتە زیاتر خولیای ھەبوونی ئەسپ و ئەسپسواریم کەوتە سەر و ببو بە خەونی شەو و ڕۆژم. بەڵام بەداخەوە لە شارێكی وەك مەھاباددا ئەوکاتە ھیچ شوێنێكی لێنەبوو وەك فێركاری ئەسپسواری یا تەنانەت شوێنێك بۆ ڕاگرتنی ئەسپ.
تەنانەت بابم و براكانیشم ھاوڕانەبوون لەگەڵمدا و نەیاندەھێشت بە دوای خەیاڵەكەمدا بڕۆم"
"تەنها كەسێك كە لە پشتم ڕاوەستا و یارمەتیدەرم بوو، دایكم بوو. بەڵام دیسان بەهۆی نەبوونی هیچ جێگەیەکی ئەسپسواری لە مەھاباد، بە ناچاری لە زانكۆ لە بواری ئابوریدا دەستم بە خوێندن کرد و دوای تەواوبوونی زانكۆش سەرقاڵی کاری ژمێریاری بووم تا پێنج ساڵ لەمەوبەر. پاشان لە مەھاباد جێگەی تایبەت بە فێربوونی سواربوونی ئەسپسواری داندرا و منیش ھەر لەوێ بە شێوەیەکی دروست و بە تەواوی فێری سوارچاکی بووم.
دوای ئەو فێر بوونەش هەوڵم بۆ گەیشتن بە ئاستێکی بەرزدا لە وەرزشەکەدا و
و توانیم ببمە یاریدەدەری ڕاھێنەر و ڕاهێنان بەو كەسانە بکەم كە وەك خۆم خولیای ئەسپسوارییان ھەبوو.
ئێستاش خوێندکاری ڕاھێنانم لە بنكەی سواربوونی زانكۆی تاران و ماوەی سێ ساڵە جێگری سەرۆکی یەکێتی سوارچاکانم لە شاری مەھاباد"
...
